「婆羅洲有個蘭芳共和國。」陳雲憶述這個童年時聽來的傳說。他相信「呢個係海外華人建國嘅唯一例子。」
在元朗八鄉橫台山客家村長大的陳雲，於五、六歲的時候，從世叔伯口中聽到這個發生在「咸豐年代」的客家人海外建國的故事。未知是否就是他城邦論的萌芽。
「客家人第一次喺印尼加里曼丹建立蘭芳共和國，後尾俾荷蘭人打敗咗。其後借屍還魂去咗星加坡，但係星加坡唔係華人國家。」《香港城邦論》作者、「粉絲」口中的「國師」，陳雲如是說。
一本正經的學者眼中，陳雲確實有點「神神化化」：一時開壇作法，一時說天邊已出現大鵬金翅鳥；對於行不公義的人，也會施以「皇天擊殺」的詛咒。
陳雲是德國哥廷根大學民族學博士，德意志帝國的締造者卑斯麥的校友。對於經常被人說「冇食藥」，陳雲說，「如果喺網上玩言論，唔係咁，揾鬼睇咩！」他認為自己白紙黑字的文章，都有紋有路，只可以說「嗰啲人冇幽默感。」
撰文：黎加路
攝影：易仰民
發夢始祖 繼續爭取普選
時下年青人的「發夢說」，陳雲也許是始祖。他說：「有時我會借嗰啲嘢避開啲法律責任。好似話呢啲係上天講畀我聽嘅嘢。」
喜談勇武的陳雲，卻認為跟極權應鬥智力，而非武力。講起歷時兩個多月的反送中運動，他說：「今次唔係美國介入，輸到仆街！」
曾經協助前任民政局長何志平在政府工作11年的陳雲，坦言政府「其實依家犯嘅已經係戰爭罪行，係來自最高層嘅指令。咁，高層要集體自了，品質咁差。」對於眼前的困局，陳雲卻異常樂觀，尤其是對9月9日美國國會復會，開始審議《香港民主及人權法案》。「到時只要監護住普選，之後再要處理呢班人，但冇普選係解決唔到嘅。」國師這樣認為。
陳雲的籍貫是寶安深圳觀瀾，客家人。阿爺離鄉別井，到婆羅洲沙巴謀生，父親在南洋成長。像不少愛國華僑那樣，陳父上世紀50年代回國報效祖國，失望之餘返回深圳鄉下，伺機偷渡香港，輾轉在八鄉北部的橫台山落腳，從事中醫藥工作，育有五個孩子。排行第二的陳雲，在屯門醫院出世，其母替他取名雲根。陳雲說，「雲根在客家話中是指山上嘅岩石。」
60年代的橫台山，家家戶戶插五星紅旗，是一個連警察也不敢隨便進入的「紅色根據地」。陳雲自言在農牧工會長大，上過初級的毛澤東選集學習班，成日要演講，學游說。陳雲在愛國的橫台山小學上學，他回憶稱，「我細個接受過戰爭教育，經歷過民兵訓練。嗰陣時要响兩個山頭度，大家拎住假槍，用棯樹啲葉紮住頭，扮游擊隊，搶對方軍旗，將對方打走、捉戰俘。」
陳雲說：「所以知道戰爭第一件事係政治同游說囉，唔係打仗，從來都唔係打仗。如果政治上輸咗，戰爭上贏咗都係冇用，嘔番出嚟，依家中共唔係唔識呢套嘢囉。好似土改，殺晒啲地主，打上海……」
訪問在沙田的新城市廣場進行，可能是陳雲就自己的方便，但畢竟這裡是他出戰過的新界東立法會選區，母校中文大學的所在地。
意見太多 民主政府無得留低
80年代初，陳雲在新亞書院唸英文系，住在大學宿舍。九廣鐵路剛從入隧道要關窗的舊式火車，改為舒適的電氣化火車。儘管中英就1997年回歸問題展開談判，事情好像還很遙遠。未填海起樓的吐露港，仍是人間的仙境。
問陳雲修讀英文的原因，他笑言「嗰陣諗住讀英文係去做政務官。好現實嘅，你讀政治，唔係走去搞鬥爭囉，去考政務官，或者考EO（行政主任），都係要睇英文。讀政治，殖民政府對你多顧忌。」
陳雲坦言，86年畢業後，曾經考過AO（政務主任），但係失敗。他憶述，「考完，俾個考官响背後鬧咗一輪。話你呢啲嘢，民主咗就可以做，依家做唔到嘅，太過多嘢講嘞，咁多創建，民主政府就得。」
結果，陳雲做了中文主任，在上水及元朗區議會做文書嘅工作。他形容這是一份可以好hea（懶懶閒）的政府工。幸好因工作之便，加上自身在元朗鄉議局中學畢業，陳雲結識了一些鄉紳及「新界王」，「好似戴權、劉皇發。」結了一個地緣。
只做了半年中文主任，陳雲獲母校提供獎學金及助教工作，返回中大修讀比較文學碩士課程。畢業後，分別在珠海書院、能仁及樹仁學院任教；其間，開始為香港時報的「文化與生活版」供稿。陳雲回憶稱，他是在珠海書院認識黃毓民，時報結交卜少夫。「偶有聚餐，都是卧虎藏龍。學到好多嘢，吸收啲老前輩嘅嘢，成長得好快。」陳雲笑言，「細個喺共產黨基地玩，大個喺國民黨玩。」
赴德進修 回港不做外國人
文曲星高照的陳雲，1990年春天獲獎學金前赴德國哥廷根大學修讀民族學博士學位。他說：「走得好匆忙，手上嘅教學工作都要交畀同事做。」也許是六四事件的緣故，大陸學者未能到德國進修，陳雲在中大的德文老師通知他有這樣的一個機會。陳雲說，「原先想去法國，自己嘅法文比德文好。在中大時，幫過啲大學教授做繙譯，其中一位法國人類學家話要帶我去法國讀書。點知當我畢業時，佢入咗精神病院。」
陳雲笑言，「聽法文老師講，啲法國學者好多到咗中年期，都要入去住（精神病院），好正常。一係就離婚，一係就去大溪地。去大溪地嗰啲比較好啲，當度一度假。」
陳雲以「民族學在中國學科的建立過程」為博士論文題目，研究解放前（1918至1949）的民間歌謠。他自言以德文撰寫的論文，在導師指導下很快完成。留學期間，陳雲加入了「中國民主聯合陣線」，還當上了兩年主席。他解釋稱，「係萬潤南啲門生喺德國做嘅。佢哋有黨爭，選唔到主席。」陳雲幽默地說，游說他做主席的人，「耐咗先知道係大使館啲人。」
陳雲坦言，「民運期間，已經接觸到北方嘅高層。」取得博士學位後，有一位留德學憲法的「北京嘅人」向他說「返香港就可以做官，建立身分。」「你見過漢堡嗰位仁兄啦，幫政府做繙譯、做情報工作，有間屋囉，娶咗老婆，生咗兩個仔，揸架福士仔，咁就成世嘞。」陳雲內心也覺得，留低都係「黐人啲自由用啫。」「即使入咗籍都係一個外國人。」於是在95年尾，返回香港。
「佢有兌現諾言，唔係去咗老懵懂嗰度做嘢囉。」陳雲覺得「北京人」沒有「老點」他。
回港後，陳雲在葉國華的政策研究所工作。他笑言，當其時的招聘廣告，好似為他度身定做，「寫到係要研究文化政策，又要有博士學位，又要熟悉香港嘅嘢，又要喺政府做過嘢。成個香港係得我一個。」陳雲說是他寫信給葉國華。
在研究所內，陳雲認識了副主席何志平。自此以後，陳雲的仕途，一直跟這位著名的眼科醫生連在一起。何志平2000年入藝術發展局任主席，兩年後，獲董建華委任為特區民政事務局局長。十年來，陳雲都是何志平的「文膽」及文化政策的「謀士」。陳雲記得在政府的工作做到07年的7月1日，之後輾轉到了嶺南大學執教鞭。
參考紐西蘭 建立自治城邦
「國師」對2016年循新界東出選立法會議席落敗一事，顯得有點像「方丈份人好小器」，久不久就「幸災樂禍」，說大家當年不懂珍惜他給予香港「永續基本法」的機會。陳雲說：「基本法永續，一定要做。如果嗰陣時做咗，依家冇咁艱難。」他是輸給梁天琦的選舉「替身」梁頌恒，僅差三千多票。
陳雲說，「其實我隱退咗，只不過今次逃犯引渡條例，冇辦法唔出嚟。」他解釋謂，近年「淨係做文化，對外唔會講政治，等啲人知道政治沉悶嘅可怕。」陳雲深深不忿地說：「過去我一路出去，佢哋一路好似當我發癲咁一路鬧。」
自認是「實務政治」的陳雲，談到建國論會否又被譏為癡人說夢。他說，「笑唔笑，結果都係建國，冇第二條出路。你只係建國嘅狀態，畀吓面中共，留番一個自治城邦，同佢有個宗主國關係，好似紐西蘭同英國咁嘅狀態。叫佢落嚟剪吓綵，選到特首，上去畀佢形式上任命吓，護照有佢中華人民共和國嘅名。」
有「粉絲」在反送中運動高舉美國國旗，吸引到外國媒體的報道，陳雲笑言，已成功令到美國將《香港民主及人權及法案》放到國會的議事日程。他認為「美國立法幫香港普選，呢啲都係『條約政治』。」陳雲指卑斯麥就是用條約政治，建立帝國。
「國師」幻想，如果有朝一日，華夏建國，他就是繼卑斯麥之後，成為哥廷根大學的著名政治校友了。「華英共和國」的國歌，也許又是上天給他的報夢：皇皇香港，育我長我地方。皇皇香港，歷劫不動城邦。華英並茂，古今交集，流芳百世有我承當。九七風霜，淪落蠻荒，美好家園……。
 |
| 常被人說「冇食藥」，陳雲認為自己白紙黑字的文章都有紋有路，只可以說「嗰啲人冇幽默感。」 |
 |
| 談到建國論會否又被譏為痴人說夢。他說，「笑唔笑，結果都係建國，冇第二條出路。你只係建國嘅狀態，畀吓面中共，留番一個自治城邦，同佢有個宗主國關係。」 |
 |
| 陳雲過去曾是何志平的「文膽」及文化政策的「謀士」，在政府的工作做到07年的7月1日，之後輾轉到了嶺南大學執教鞭。 |
Source: 蘋果日報
https://hk.appledaily.com/local/20190911/RUYZZGTEGHIIBYWHFJRMKYON4Y/
No comments:
Post a Comment