What's happened, happened.
無論我們是否願意承認，事實上現時的抗爭力度已遠不如去年今日。超過一萬人被捕後，抗爭者再不能隨時數區同時開花，與黑警武鬥周旋，對峙整天不散。現時抗爭，更多是在遊行成型前，黑警先行見人就拉，任意封一條街，拉一百個街坊帶上車。每次行動，彷彿都係用緊二百人三百人被捕，去換一個機會搏取新聞畫面，例如小女孩或孕婦被襲，好等大家係IG story洗版一晚，好嬲好嬲，提醒大家黑警同暴政嘅邪惡。
的確，搏取警暴畫面可以換來數日輿論，但代價係三百人被捕。多得而家嘅「法治」，呢三百人中，即使只係行過路過，都難保唔會有唔少人被羅織罪名入獄，蒙受不白之冤。被捕人數唔係一個數字，係有血有肉有親友嘅手足。係二零一九年，本地戰線仍然不停劇變，更多街頭抗爭對局勢可以有更大嘅影響。但到左而家二零二零年，政權及警暴嘅猖獗都已經再清楚不過，香港人同世界其實都唔再需要更多嘅畫面去證明佢地嘅邪惡。而政治局勢亦大勢已定，國安法都已經到來，港共政權不惜一切嘅白色恐怖、一國一制統治方針已定，另一邊廂各國都排住隊對付中共，天下圍中之勢已成，用三百人被捕嘅代價去搏取一個畫面，係二零二零年嘅香港又係咪值得？不停號召街頭抗爭行動「重燃戰火」又係咪適當？
Maybe it's time we stop trying to outsmart the truth and let it have its day.
或者係時候大家要承認「反送中運動」、「流水革命」已經完結。我會定義呢場運動／革命嘅終結係今年七一遊行。（點解係呢日，篇幅所限不在此詳述。）
而現今，香港歷史已經走過抗爭年代，步入「白色恐怖年代」。我之所以選擇今日寫呢啲，係因為今日係928。於今日回望，我地就會知道，承認一場戰役嘅終結並不代表戰爭嘅終站。只有直視過去嘅失敗，先可以開創下一次成功嘅契機。「一息尚存、抗爭到底」並唔只係一句口號，但亦唔代表我地要依戀二零一九、活在過去，勉強為之去號召「重燃戰火」。係後反送中時代，當然我地要係可行嘅空間中盡做，但更加審視過去嘅不足。二零一四嘅失敗，去到二零一九教識我地要和勇不分、唔可以依賴大台等等。二零一九未竟全功，又教識我地啲咩，我地有咩要反思？
一）無大台社運嘅侷限：無大台社運呢個原則好有優勢，亦絕對係二零一九抗爭取得初步成功嘅最重要原因之一，但難聽嘅事實係：抗爭者兵敗理大，正正暴露左無大台社運嘅侷限。過去有「大台」嘅抗爭，「大台」嘅社運組織會係行動前仔細審視，開會去商討一切戰略安排同可行性，準備好應對計劃，計好風險同危機先行動。（做得好唔好係另一件事。）但無大台抗爭之下，尤其是去到後期，當抗爭規模愈黎愈大，對計劃細節嘅準備要求愈高，但抗爭者始終冇一套好有效嘅決定同商討機制，問題就出現。好多時候抗爭者只有「跟風向、跟大勢」去做決定同行動。初時或者可以，但去到理大圍城戰咁嘅規模，情報傳遞嘅渠道、物資補給鏈嘅安排、或者由一開始全港抗爭者聚首理大呢個容易被圍嘅地點呢個決定，事後諗返，都好有改善嘅空間。只不過係無大台社運嘅侷限，實在難以有機會好好考慮呢啲安排，而再將安排實踐係數萬名抗爭者之間。呢點係抗爭者需要洞察到 Inconvenient Truth。當然我始終認同「無大台」好過過去一套由大台主導嘅模式，但二零一九嘅「無大台」Prototype 1.0需要再進化，呢點點做，我相信有日用香港人嘅智慧，終會諗到。
二）「流水社運」嘅侷限：另一個難聽嘅事實，係「流水社運」係黨鐵成為黨鐵後，已經效力大減。Be water嘅戰術係抗爭早期，七月已經出現，嗰個係大家仲會係收銀機上面放散銀、黑警唔會衝入地鐵站嘅年代。早期，抗爭者直情係可以全幅black bloc幾百人一齊搭地鐵轉場。直到八月後期，國家機器批鬥地鐵係幫緊抗爭者，先出現八三一事件，警察先長駐黨鐵站，黨鐵先成為黨鐵。Be water戰術，完全依賴抗爭者嘅機動性。但係香港交通，特別係抗爭時期路面交通隨時受阻或有roadblock等，鐵路實在太重要。Be water最盛行，係八月前期，抗爭者可以快速搭鐵一晚去五六個地方，當中包括觀塘、大埔、紅磡、荔景、沙田等等真係去邊都得，但我地回想八三一後嘅抗爭，係冇得安全方便地搭鐵之後，所謂嘅「轉場」，其實次次都係夜晚旺角，極度容易預測。呢個係Be water戰術對地鐵嘅依賴，以及係黨鐵歸邊後嘅失據，而抗爭者從來冇搵到方法應對。容我魯妄講，真正嘅「Be water」戰術已經一早被破解。
「錦鯉有咩高見？」冇架，所以而家香港社運先係低潮，大家再諗下囉。但係係社運以外，我地更加要好好活下去，係唔同方向裝備自己，等待下一次抗命號角嘅呼召。
What's happened happened. Which is an expression of faith in the mechanics of the world. It's not an excuse to do nothing.
二零一九中突然爆紅嘅人物，都唔係係石頭爆出黎。有好多人係二零一四嘅失敗過後，將抗爭信念收係心中，但同時默默地係鎂光燈後，甚至係社運、政治以外做左好多嘢去精進自身，先可以將一己之長係二零一九派上用場。梁繼平多年前已經開始著書立論，亦係港大政治法學中成績最優異嘅未來學者，先有大家見到嘅情理兼備、字字鏗鏘嘅立會演說。張崑陽係雨傘運動後第一代本土派學生會幹事，縱使當時唔多人認識，但一直確立本土論述、又轉校到港大就學讀中國研究、讀國際關系，先有係美國國會聽證會上為香港人發聲嘅機會。何桂藍過去咁多年一直執筆紀錄香港嘅社運，係佢用佢嘅真摯訪問感動百萬人之前，我自己都好慶幸係「後雨傘」嘅社運低潮期接受過佢訪問，聽過佢好真誠咁鼓勵我繼續堅持落去。又如醫學界，杏林覺醒係二零一五年成立、鄺葆賢醫生都係二零一五年參政。
係呢啲出名嘅人以外，簡單到係我身邊，都有好多朋友，係「後一四低潮期」做左同社運、政治唔關事嘅嘢，但係二零一九年真係有用。有入左傳理系嘅中學同學，而家係為外媒工作嘅抗爭前線記者。有學藝術設計嘅幫好多team人出左好多文宣。有好幾位朋友單憑落區工作嘅心，做左區議員。有呢幾年會搞下IG shop嘅朋友，突然之間變左黃店老闆。有朋友冇咩特別技能，但至少買左架車，都可以做家長車司機。又有朋友咩都唔識，但係識得上一輩嘅朋友多，結果佢2019幫經濟困難嘅手足搵左好多支援。而我自己，2014後碌左入醫科，幾年冇掂社運，到2019都叫可以係醫科圈子中幫手搞下啲聯署呀集會呀咁。
—
雨傘清場嘅 We will be back ，好多人當年好憎呢句說話，因為好阿Q精神，好自欺欺人。執筆之際，先見到2018年一位年輕人嘅訪問，斷言：「we will be back已不可能發生」。但就係因為大家係2014-2019間，即使冇日日繼續街頭抗爭，但透過裝備自己嘅技能經驗，再係機會黎嘅時候善用，先有二零一九，先真正兌現 we will be back嘅諾許。「團火未熄」，原來唔需要用街頭抗爭、唔需要用被捕數字、唔需要用警暴畫面去證明，去做比人睇，而係用行動去實踐，有一日大家都會見到。
未來，我地面對緊一個可能比「後雨傘低潮期」更加黑暗更加漫長嘅「後反送中低潮期」，但我地要一樣咁再做一次，下一次抗爭開始時，下一次係海富門外再遇彼此時，我地會更為強大。
I'll will meet you in the beginning, my friends.
Source: No Stake 醫學生
https://www.facebook.com/nostakemedicalstudent/photos/a.140123600705521/380693993315146/
