Showing posts with label Author 黃浚滔律師 Henry Wong Solicitor. Show all posts
Showing posts with label Author 黃浚滔律師 Henry Wong Solicitor. Show all posts

Tuesday, August 18, 2026

香港未來的社會結構

本身冇打算出呢個post,因為事不關己,己不勞心。

不過直到最近一位係香港算係中產嘅朋友失業,佢已經冇哂選擇所以最近申請咗嚟英國。我諗為咗下一代,講兩句都係好事。

愈來愈多人話回流,好多移英港人心入面仲以為佢哋成日返香港,所以仲好了解香港。最多都係周圍簡體字,大陸化咗。應該唔會咁多宏福苑嘅事嘅,有嘅都已經有後備passport,怕什麼。

仲有就係一班天真嘅香港人,以為小朋友滿口英文,成為BBC同CBC之後喺香港會有更高社會地位——呢一樣係以前嘅事,但一切將會改變。

1.不出五年,香港最高社會地位係一班高幹子弟。唔係大家上tiktok見到個班偽文明中國人。係一班滿口純正美式英文,同時講到自己家鄉話同普通話嘅真知識份子。唔只有知識,佢哋仲好有創意,更加係見過世面。比起香港幾大家族嘅後代可能仲體面。呢一班人係上兩代長輩係鬥爭中已經filter咗出嚟,留低嘅精英。更重要嘅係,佢哋比香港人更明白咩係資本主義,佢哋識得用社會主義包裝住精英主義去穩固自己嘅地位。佢哋明白,窮人同無教養嘅人嘅貪慾係最惡但都係最易控制。佢哋有嘅一定係五本護照以上。

2.第二高地位就係一班香港乜乜大王嘅家族後代。其實佢哋比任何人都努力。但時勢要佢哋揀位企。好可惜,佢哋上一代幫佢哋揀咗。無論佢哋點叻點有創意,都只會成為輔助社會最高層嘅一群,但唔會上到最高。佢哋唯一任務,就係唔好出錯。佢哋一定有三個或以上國籍。

3. 第三等地位,就係原先嘅中產。即係一班係九七前已經移民嘅香港人。一班真係因為父母為下一代鋪定後路嘅血統純正ABC, BBC,CBC。呢一班人係真係以為自己係中國人直到佢哋冇辦法再係中國人。佢哋未必叻,未必有創意,但佢哋會有一定程度嘅見識(唔係細細個去博物館個種)。佢哋大概明白世界發生咩事,佢哋有比常人多嘅選擇但未必有正確嘅選擇能力。佢哋大多數都會係名牌學校出嚟,但最後都只會維持係不比父母差嘅中產水平。呢一班人,會有最少兩個或以上嘅居留地許可(註:唔一定係國籍)。

4.第四層,一班近年移民英美澳紐加嘅回流子女。恕直言,呢一班同第三層唔同,佢哋大多數唔係貴族或名牌學校出身。見識唔多但可能會因父母關係誤認自己見識多而與人不同。但同真正上一代中產移民相比,佢哋對自我身份認同更加模糊。而且,佢哋選擇會比前三個階層少好多。因為香港嘅精英制會比以前更嚴苛,而且,佢哋會係第一同第二層嘅人入面被認為最好用嘅工具。呢一班人,同樣,最少兩個或以上嘅居留地許可。

5.最低層,好明顯,只有香港身份證嘅人。佢哋只有兩條路,一係發奮,逃出去;一係盡本份,用自己方法好好過每一日。

Source: 黃浚滔律師 Henry Wong Solicitor

https://www.facebook.com/100094319732462/posts/915962514891065/?rdid=S1AHdUHUh1frDkOO#