咁你話可以點做？

自本版建立以來，每當發文批評時局，我見得最多既留言係問我，「咁你話可以點做？」

第一，其實我一直都有講，反反覆覆咁講，不厭其煩咁講，要旨止在「修文習武」四字。香港政治最大既問題，不在於制度崩潰、吏治腐敗、官商勾結、販民左膠，而在於民智，民智一日唔開，就算將依家既美國送俾你地治理，一樣會落得香港目前既下場。而要民智開，一則讀書養氣，二則鍛鍊身體。

讀書，係學習他人及前人思想精髓，當然啦，唔係個個既思想都有精髓，部份人所著只係佢既思想糟粕，例如鄺俊宇。因此閱讀乜野書係好重要既課題，不過我並唔打算係度討論呢個題目，有興趣既可以留言，大家另外討論。話又說回來，即使係孔子、柏拉圖既著作，雖然係精髓，其實亦係糟粕，因為道之至微者，難以言傳，更難以文傳，所以讀書只係第一步，讀完要思考，要感悟，更加要實踐，斯《中庸》所謂「博學，慎思，審問，明辯，力行」是也。唐君毅先生曾經講過，「宇宙只是一大意味，人生即領悟此大意味之意味。一切語言文字最後都不能表達宇宙人生的奧秘。所以佛說法四十九年，最後說無所說；莊子說，言無言，終身言，未嘗言；孔子說，天何言哉，余欲無言。一切偉大著作的文字都只是象徵，是指不是月，如見指便不見月。故所有參透宇宙人生奧秘的聖哲都要人忘其所言，並領略言語外的意味，屆時便只有體會和讚嘆。」因此，要讀書，要揀好書讀，讀完要思考，思考完要實踐，實踐完發覺唔妥要反省，反省完就要改過。如果一個社會有一半以上既人可以做到咁，人人識得獨立思考，逐漸進入良性競爭，國家庶幾可望大治。民主而欠缺理性獨立思考同一心為公既良性競爭，到頭來只會變成另一種獨裁極權。獨不見雅典所謂既民主，最後竟然害死一代聖哲蘇格拉底乎？

習武，係為左強身健體，更係為左激發野性。有野性而無強健體格，就會變成走住屌既MK仔；有強健體格而無野性，就會變成九龍灣連儂牆打不還手硬食十三拳戇鳩仔。我相信無論係MK仔定戇鳩仔，都唔係大家心目中一個合格公民既模樣，更加唔係一個可以履行兵役、保家衛國既戰士。講到習武，又不得不講講我自己既經驗。我習武日子唔算長，大概係雨革之後，學既係日本劍道。師傅教我地，劍道講求氣、劍、體，氣係指出劍時既吶喊，劍就係劍，體係衝體，指出劍時既捨身。無錯，「捨身」，我認為就係劍道既精髓。幾年過去，我睇過既比賽唔少，親身參與既亦都唔少，我既結論係，的確「勇者得勝」。通常雙方一出劍，睇吓彼此個氣勢，已經可見勝負，尤其係攻戰雙方有無捨身既勇氣。我曾經同一個比我高段既人對打，開始前我先澄靜心神，摒除雜念，忘記會痛會死，上到場發狠就打，結果果場打得好好，事後對方都私底下同我講，有一下確實俾我嚇怕左。呢啲就係野性，野性就係你作為大自然一部份本身所擁有既天性，一份與天鬥、與地鬥、與人鬥既不屈之氣。武士道既野性源自其不畏死，不畏死既觀念來自佛家，《心經》有云「心無罣礙，無罣礙故，無有恐怖，遠離顛倒夢想，究竟涅槃。」因為已經擺脫五蘊、六根、六塵、六識、十二因緣、四聖諦而進入空空境界，其心如如不動，自然「無有恐怖」，因此一切生死苦痛劫難災害都不能入我空心而障擾之，故歷劫而不動。

「修文習武」大概就係咁樣一回事，但我要進一步指出，修文同習武並唔係兩樣獨立而行既事，而係相輔相成。劉劭係《人物志》中講過，「夫草之精秀者為英，獸之特群者為雄。故人之文武茂異，取名於此。是故聰明秀出謂之英，膽力過人謂之雄。若校其分數，則牙則須，各以二分，取彼一分，然後乃成。夫聰明者，英之分也，不得雄之膽，則說不行；膽力者，雄之分也，不得英之智，則事不立。是故英以其聰謀始，以其明見機，待雄之膽行之；雄以其力服眾，以其勇排難，待英之智成之。」簡單而言，有勇而無謀（習武而不修文），不過匹夫之勇，樊噲、周勃之流；有謀而無勇（修文而不習武），不過迂懦之謀，袁紹、劉表之類。所以，張良一謀士，而敢狙擊始皇於博浪沙，韓信一猛將，而能屈膝無賴於市井上，前者正是能謀而勇於行事，後者則是有勇而謀於將來。柏拉圖係《理想國》裡面都有提到，教育除左知識傳授外，亦都要體育鍛鍊，否則只會成為類似東方既窮酸腐儒。《周禮》中提倡六藝（禮、樂、射、御、書、數），其中體育類佔其二（射與御）。由此可見，修文同習武不可分割。

第二，我一直進行評論，都係站在執政者角度而言，所以我講既，如果你明白，就會知道係從全盤出發，而唔係著眼於細眉細眼處，如果你唔明，就會覺得我「只識批評，內容空泛，毫無實際建議」，而果句「咁你話可以點做」已經證明左你根本唔明白我係度講緊乜。

講到執政者，我又想講吓「雞蛋與高牆」呢句說話。記得2014年既時候，班戇鳩左膠好鍾意矯情造作咁自認係雞蛋，仲周圍問人你要做雞蛋定高牆。都唔講自認係雞蛋呢種示弱既戇鳩事到底有幾弱智，come on James，「雞蛋與高牆」同「你係藍定黃」其實完全無分別，都係順我者昌逆我者亡既二元霸權。記得當年有人問我要做雞蛋定高牆，我答佢，我要做坦克，輾壓高牆，然後自己重新建立新既高牆。到左今日，我想再補充一句，除左高牆，我連你班黃屍雞蛋都會輾壓埋一份。呢啲就係思想上既分別，而呢個分別，決定左你最後係當主人定係做奴才。販民左膠咁多年嚟都係憑住呢類仆街暗示式手段，灌輸我地「香港人係奴才」既思想，從而進行洗腦。

所以，奴才們唔明我講緊乜係好正常，不過我依家善意提醒吓你地，唔好再衝出嚟柒，問我「咁你話可以點做」啦，唔好再示短於人，俾人知道原來你係奴才思想啦。我見年尾就快到，先大發慈悲，提醒吓你地，等你地唔洗柒過年，算係積吓陰德。

第三，我被問得最多「咁你話可以點做」既階段係中大之戰、理大之戰直到區議會選舉完結前後。

老實講，真正能兵者，從不言兵。趙括紙上談兵，口若懸河，其父趙奢知其不得善終，最後趙括果然「不負父望」，不單臨陣授首，而且一舉葬送左四十五萬趙軍，最後「子哭其父，父哭其子，兄哭其弟，弟哭其兄，祖哭其孫，妻哭其夫，沿街滿市，號痛之聲不絕」，敗曬趙國所有家底，搞到國破家亡。所以我從不言兵。兵只能用，而不能言，尤其仲要公開講曬出嚟，人地就會知道你心思係點，可以揣摩研究，到你真正要上陣打仗既時候，敵人已經清楚曬你既底牌，試問你仲點打？果啲一日到黑係度侃侃而談既人，試問有幾多個真係有能力上前線帶兵打仗？試問有幾多個既意見真係有用？我俾五千人你，係旺角同黑警開戰，應該要係邊度建立據點？邊度可以埋伏？邊度可以屯糧？糧道應該設係邊度？點樣保護糧道？用咩戰術可以制勝？要幾多武器？武器要咩類型？你以為真正要組織一場戰爭係咁容易既事？我唔講，係因為我自知不足，而且知道講都無用，因為我只係個無兵司令。我講左又點？你地都肯聽我枝笛衝上前線執行我既計劃？唔會囉，你地只係口痕口賤，係要搵野嚟拗囉，係要雞蛋裡面挑骨頭囉，所以我唔會因為一時意氣，同你地逞口舌之爭，而輕言軍旅之事。《孫子》第一章第一句就開宗明義，「兵者，國之大事也，死生之地，存亡之道，不可不察也。」一件關乎所有人生命既事，同你三唔識七，仲要態度咁撚差，挑釁住咁問我，就要我隨隨便便講出嚟？瞓啦柒頭。

其次，我點解要一直屌鳩販民左膠販粉黃屍豬？因為你地係內奸，有你地係度，唔好話打贏仗，連唔打輸仗都好難。我未聽過有內奸係軍隊而軍隊可以打贏仗，所以我一直都致力肅清你呢班內奸，就係為左打贏仗。你地先係問題根源，係心腹之疾，黑警只係癬疥之疾，收拾左內奸，要滅黑警根本只係反掌之事。我地陣營之憂根本不在顓頊，而在蕭牆之內。所以，販粉黃屍豬們，如果你地真係想知「可以點做」既，咁我依家就正式答你啦，就係去維港集體跳海啦。

我一直以嚟論政，唔單止係從全盤出發，而且係從根本出發，而根本問題在於民智未開，民智未開在於販民左膠荼毒。我正正知道問題癥結所在，所以一直致力於解決呢個問題，呢個問題唔解決，其他免談。因此唔好再問我「咁你話點做先可以直搗黃龍」，如果你真係非問問題不可既，唔該問「咁你話點做先可殺左秦檜」。

第四，講到用兵，令我諗起「冷氣軍師」。自從「冷氣軍師」呢個戇鳩詞彙出現後，我早就想批評，不過一直苦無機會，今日就順便講講。我知道，好多我既反對者都覺得我係冷氣軍師，不過我想講，我唔介意你地覺得我只係個坐談者（唔通我識如來神掌又話你聽咩），但請你地鬧我之前，先搞清楚你地用嚟鬧我既詞彙概念，其內涵到底係乜野，如果唔係只會惹我嘲笑同鄙視，亦令我覺得莫大悲哀，「批評我既人點解質素都咁低？」

「軍師」既本質就係「冷氣」，劉邦稱讚張良「運籌帷幄之中，決勝千里之外」，「帷幄」就係「冷氣」，就係坐鎮後方，指揮前線。不過以前未有冷氣，依家有冷氣，所以以前係「帷幄」，依家係「冷氣」而已。軍師唔係坐係後方指揮進退，而係同將軍士卒一樣衝鋒陷陣，仲叫咩軍師？果啲人云亦云跟住用「冷氣軍師」嚟攻擊人既戇鳩仔，你地到底知唔知你地有咩矛盾？你地到底知唔知「冷氣軍師」同「阿媽係女人」其實異曲同工？你地以為用呢個詞嚟形容我或其他俾你地攻擊既人，就係嘲笑緊我地？殊不知辱在彼而不在此。

此外，通常會用「冷氣軍師」形容其他人既人，都會覺得自己唔係「冷氣軍師」，而佢地覺得自己唔係既原因，在於佢地有出去鳩叫遊行（如果連出去鳩叫都無，我真係唔明點解佢地好意思話人係「冷氣軍師」），所以佢地覺得自己好有建樹，而我地呢啲「冷氣軍師」就淨係識指指點點得把口。講到呢度，我又想講個故事。話說劉邦殺左項羽，正式奪得天下後，要論功行賞，於是劉邦首先封左蕭何為酇侯，食邑八千戶。班將軍不服，隨即起哄，向劉邦投訴，話自己披堅執銳，幾番血戰，攻城略地無數，而蕭何未有汗馬功勞，封賞竟然係眾人之上。劉邦回答佢地，話蕭何係發施號令既人，而眾將係獵狗，眾將攻城略地就好似獵狗擒得獵物，而如果無蕭何指示獵物係邊，咁眾將亦唔會擒得獵物，所以眾將係因為蕭何之功而有功，蕭何既封賞當然係眾人之上。我都唔講你地出去鳩叫，連功勞都無，就算有，都只係獵狗之功。我唔敢講自己係蕭何，我只係想為其他俾你地無理謾罵、抹黑、嘲笑而真正有蕭何之功既人講句公道話，你地就只係一群獵狗（甚至獵狗都不如），而「冷氣軍師」們先係蕭何。請你地唔好再用「冷氣軍師」嚟攻擊其他人了，因為咁樣只突顯出你地既智商同果班莽夫將領一樣，甚至更低。

第五，知唔知點解你地咁鍾意問人「咁你話可以點做」？因為你地由細到大受既教育都只係單向灌輸，而唔係雙向討論，亦即係為人詬病多年既填鴨教育。大部份父母同老師都因為掌握住細路既生殺大權，由有無得食飯，到品行同成績既評分，係咁樣既前提下，大人們好容易形成專斷獨裁既性格。尤其香港呢廿二年嚟既情況咁艱苦，好多大人係出面受左上司或老闆既氣，返到屋企或者入到教室就會將細路當成出氣袋，威權主義由是產生。

分享一個我既親身經歷。因為工作需要，我經常出入學校，接觸好多學生。有次我見到個同我幾熟既學生係度罰抄，我就走埋去睇吓佢抄緊乜，「黃老師是最美麗的老師。」我打個突，好奇之心因斯以起，於是問佢點解要抄呢句野，佢嘆一口氣，同我講，因為黃老師係課堂上讚佢自己靚，而呢個學生覺得佢唔靚，所以串鳩佢，黃老師老羞成怒，就罰佢抄呢句野一千次。呢個例子堪稱極權主義教育既經典。老實講，果個黃老師我見過，真係好撚醜，個學生只係因為講左事實，就要俾人施罰，咁同中國共產黨有咩分別？唔好話你咁撚醜我只係陳述事實吖，就算你好索，唔通我就奉旨要覺得你靚？知唔知咩叫感覺？識唔識分咩係客觀同主觀？柏拉圖係《泰鄂提得斯》裡面講過，感覺只屬於個人，一陣風吹埋嚟你覺得凍我覺得唔凍，唔通我可以話你覺得凍係錯？然則睇同一個人，你覺得靚我覺得醜，有咩問題？個學生有咩錯？

我講呢個故事，係想俾大家知道，我地既教育環境到底有幾腐敗，而由咁既腐敗環境教出嚟既人，會係點樣既人？威權教育教出嚟既就係奴才，奴才就係只識唯唯諾諾，無自己意志，無自己思想，遇事只識得請示主子（但去到要為自己謀利既時候，佢地就即刻精甩鞭，個腦轉得鬼死咁快，不過都只係朝夕自快既魚戲於釜而已）。所以淨係識一日到黑係度問「咁你話可以點做」既人，好反映得出你受（威權）教育既程度有幾高。

此外，智能手機普及，Facebook呢類單向餵飼式平台出現，亦加劇左「無意識接收訊息」既慘況，令到人類越嚟越唔識思考，個個淨係識得張開個口，等人地餵飼。香港人係新世界秩序者令全人類變成弱智既陰謀同中國共產黨奴化教育兩面夾擊之下，會出現大量咁樣既人，我並唔驚訝，只係覺得好撚煩。

最後，我非常歡迎大家理性討論，我最鍾意就係大家就住一件事據理力爭，不斷互相錘鍊，最終得出一個最好既結論，大家因此而共同進步。我認為只有培養出咁既風氣與習慣並成為社會主流，民智先會開，販民左膠先會滅，香港先有得救，其餘一切都係左計。

此外，如果你只係諗住嚟找我晦氣，刁難我，咁我勸你都係慳返啖氣，唔好自取其辱，無論藍屍定黃屍。至於一眾販民左膠保皇狗既打手們，你地即管放馬過來，我預先係度祝你地賺到錢都無命洗，冚家落地獄，接受永火洗禮，唔怕死既就嚟我度洗版啦。

Source: 南金東箭

https://www.facebook.com/103378051022204/posts/164436051583070