勇武憑空消失兩星期、你有「場抗爭就黎輸」的亡港感嗎？／1月19日，就係抗爭榮枯分界線

著名KOL燈神蕭響新近嘅一條影片突然提出一個問題，質問大家「究竟仲想唔想繼續個抗爭運動落去」、「如果仲想，咁打算做咩去維持個運動嘅Momentum」，好明顯，即使反對勇武抗爭、奉行「和理非原教旨主義」嘅燈神蕭都開始feel倒一種「亡港感」，就係場抗爭好似開始輸緊。

當然響度我要嚴厲指斥呢班以蕭若元、劉細良為首嘅「和理非廢老KOL」，造成今時今日抗爭退潮，持續響呢場運動抹黑勇武派，鼓吹、甚至親自參與捉鬼，得到呢個結果絕對係咎由自取──只可惜幫佢地嘅愚行一齊埋單嘅，卻係全香港人。

和理非原教旨主義者即使口入面唔提，但心裡面卻認定勇武就係搞禍抗爭運動嘅一粒老鼠屎、恨不得除之而口快。佢地最先嘗試制訂「割席宣言」、設立「抗爭行動守則」以變相重建大台不果之後，於是就透過「捉鬼」方式將進行裝修破壞嘅義士「非人化」，因為全部都係鬼所以可以肆意攻擊，搞到大量勇武小隊心灰意冷退出抗爭仲可以大條道理話「求其作個名都可以扮退場」黎結束──

結果真係如老燒劉細良等人所願，足足兩個星期經已再無充堪一提嘅勇武抗爭，但學班左膠追問一句：然後呢？然後，就再沒有然後。老燒口中嘅「抗爭Momentum」，其實就係講緊抗爭運動對特衰政府嘅衝擊力，而不得不再三重覆之前我曾提過嘅「抗爭方程式」：

人數 X 激烈程度= 抗爭衝擊力

只可惜，和理非班垃撚圾，好多心入面根本無認同過勇武抗爭嘅作用；佢地只係因為勇武派大多遭受最殘酷嘅警暴而感到同情，但心裡面卻仍然認為勇武只會為成場運動抽後腿，「係會令到一家大細唔敢再上街」、「民意逆轉」。咁而家勇武派消失咗兩個星期，成場抗爭運動就好似憑空消失一樣，和理非有無搵倒一個延續抗爭嘅辦法出黎？呢班壞鬼書生只會同你講「登記功能組別選民」、「利用區議會深耕細作」──你老味如果議會係有用，咁當初做乜要上街？

劉細良甚至無恥到叫大家遇到水炮車時「一家大細全部坐響馬路，睇下警察夠唔夠射我地」──即係咁撚多次衝擊，劉細良有邊一次係企響最前線親身承受警暴？係無，佢永遠只係企響最安全嘅地方指點江山，所以乜撚嘢「全部和理非一齊坐響馬路迎戰水炮車」當然只係得個講字。

當勇武派消失，而和理非坐而論道卻完全無實質行動填補呢個缺口，政府無咗呢種壓力，當然就騰出手黎進行各種「止暴制亂」嘅抽後算帳行動。愈來愈多警力擺咗響搜查義士屋企、迷你倉；原先已成功保釋嘅義士又再重新被拘捕再送上法庭，甚至連余若薇都預告「將會有好多令人憤怒嘅審判結果出現」。

但呢班和理非嘅對抗方法係咩？唔係劉細良式9噏，就係好似余若薇呢班離地政棍咁，叫人「有理有節走去和平示威」──而亦正如我支持所言，響政府眼中，和平示威嘅激烈程度就係0，而0無論乘以幾多百萬，都一撚樣係0，無勇武派上場，場抗爭基本上玩撚完。

過去一星期示威集會響無聲無息之間完結，我地都仲可以瀨係因為台灣大選轉移咗大家嘅視線，但119中環遮打花園及遮打道行人專用區集會，卻係呢場「逆權運動」嘅榮枯線──假若今個星期日嘅集會都係同上星期一樣引爆唔起任何衝擊力、又或者和理非再次借「捉鬼」對勇武義士進行迫害，咁其實已同為呢場為期大半年嘅抗爭運動敲響喪鐘無分別。

當然，你話往後飯民大台再搞遊行集會，仍然係有吹雞幾十萬甚至過百萬人上街嘅能力，問題係當回歸「大家準時出發打卡、行完準時散水」，而劉細良所謂「全部坐響馬路等水炮車射」只係無責任9吹嘅時候，林鄭又終於可以番番去6月9日果晚，一片道貌岸然咁同大家講：「政府尊重遊行人士表達訴求嘅權利，但政府仍然會一意孤行」。

至於從勇武派角度出發，當呢一刻政府嘅打壓力度咁強、而和理非又對各種裝修破壞行為咁反感，長遠黎講呢啲衝擊都只能逐步轉入地下進行，以孤狼式快閃突襲取代過去嘅陣地戰──無錯個衝擊力係會減弱好多，但至少因為被捉鬼而陷入自己人「背刺」嘅風險同時亦低好多先。

正正由於1月19日集會對於成場抗爭嘅進程係有一個咁重要嘅象徵意義，其實我都有個衝動呼籲勇武派響呢一日「全體休息」，等一班和理非充份感受到果種抗爭即將玩完嘅「亡港感」，迫使佢地重新尊重番勇武派響呢場抗爭入面嘅角色，而唔係佢地呼之則來、揮之則去嘅Condom。

但當然，有義士選擇為大局繼續冒風險犧牲，我都同樣尊重，但和理非仲係死性不改落去，抗爭運動嘅頹勢，只會愈來愈明顯。

Source: 無神論者的巴別塔
https://www.facebook.com/henryporterbabel/posts/2668757746553415?__tn__=-R